ՍԵՅՐԱՆ ՕՀԱՆՅԱՆՆ ԱՐՁԱԳԱՆՔԵԼ Է

«Զինվորական ծառայություն հենակներով» հրապարակմանն անմիջապես արձագանքել է ՀՀ պաշտպանության նախարար Սեյրան Օհանյանը, ով հուլիսի 7–ին հանդիպել է ավելի քան 13 ամիս հենակներով զինվորական ծառայության մեջ գտնվող Աշոտ Ոսկանյանին:

Նախարարի կարգադրությամբ զինվորին Վարդենիսի զինվորական հոսպիտալից բժիշկների ուղեկցությամբ տեղափոխել են պաշտպանության նախարարություն:
  Հանդիպումը տեղի է ունեցել հենց նախարարի աշխատասենյակում՝ մի խումբ բժիշկների մասնակցությամբ (ռազմաբժշկական հանձնաժողովի նախագահ, վնասվածքաբան):
  Սեյրան Օհանյանը անձամբ է խոսել զինծառայողի հետ և հետաքրքրվել նրա առողջական վիճակով: Նախարարն ասել է, որ ինքը խնդրի հետ ծանոթացել է ինտերնետային հրապարակումներից: Ներկա գտնվող բժիշկներին նախարարն ասել է, թե սովորական աչքով էլ երևում է, որ զինծառայողը ոտքերի հետ կապված խնդիրներ ունի: Նա հրահանգել է, որ Աշոտ Ոսկանյանին hետ զորամաս չտանեն և տեղափոխեն Երևանի կենտրոնական հոսպիտալ՝ նրան բուժելու նպատակով:
  Արդյունավետ բուժման դեպքում Ոսկանյանն իր զինվորական ծառայությունը կշարունակի հենց հոսպիտալում կամ էլ կզորացրվի: Զինվորն այս պահին գտնվում է Երևանի կենտրոնական հոսպիտալում՝ բժիշկների հսկողության ներքո:

19-ամյա Աշոտ Ոսկանյանը շատ տպավորված էր նախարարի հետ ունեցած իր հանդիպումից և շարունակ կրկնում էր. «Շատ լավ մարդ էր»:

Զինվորի ծնողները՝ Վարդան և Քնարիկ Ոսկանյանները իրենց երախտագիտությունն են հայտնում պաշտպանության նախարարին և ակնկալում են նրա վերահսկողությունը իրենց որդու լիակատար բուժման հարցում:
ԱՂԲՅՈՒՐԸ`
http://www.lragir.am/src/index.php?id=country&pid=27779
ԺԱՆՆԱ ԱԼԵՔՍԱՆՅԱՆ
  Հիշեցնենք, որ 2009 թ. հուլիսի 4-ին Հելսինկյան Քաղաքացիական Ասամբլեայի Վանաձորի գրասենյակը ՀՀ ՊՆ 75937 զորամասի ժամկետային զինծառայող Աշոտ Ոսկանյանի առողջական վիճակի վերաբերյալ բաց նամակով դիմել էր ՀՀ պաշտպանության նախարար Սեյրան Օհանյանին: