Զեկույցները ներկայացվեցին հանրությանը

2009 թ-ի հուլիսի 1-ին Երևան քաղաքում կայացավ «Լոռու մարզում 2008 թ-ի գարնանային և աշնանային զորակոչերի մոնիթորինգի արդյունքների մասին» և «Մարդու իրավունքների վիճակը Լոռու մարզում 2008 թ-ին» զեկույցների շնորհանդեսը:

«Լոռու մարզում 2008 թ-ի գարնանային և աշնանային զորակոչերի մոնիթորինգի արդյունքների մասին» զեկույցը տպագրվել է «Քաղաքացիական վերահսկողության ձևավորումը զորակոչի գործընթացի նկատմամբ» ծրագրի, իսկ «Մարդու իրավունքների վիճակը Լոռու մարզում 2008 թ-ին» զեկույցը` «ՀՔԱ Վանաձորի գրասենյակի իրավապաշտպանական կարողությունների և գործունեության արդյունավետության բարձրացումը» ծրագրի շրջանակներում:
Ծրագրերը իրականացվել են Բաց Հասարակության Ինստիտուտի Աջակցության հիմնադրամի Հայաստանի գրասենյակի ֆինանսական աջակցությամբ:
  Շնորհանդեսին մասնակցում էին հասարակական և միջազգային կազմակերպությունների ներկայացուցիչներ, լրագրողներ, ՀՀ պաշտպանության նախարարության, Հայաստանի հանրապետական զինկոմիսարիատի, Լոռու մարզի զինկոմիսարիատների ներկայացուցիչներ:
  Կազմակերպության ղեկավար Արթուր Սաքունցը նշեց, որ «Լոռու մարզում 2008 թ-ի գարնանային և աշնանային զորակոչերի մոնիթորինգի արդյունքների մասին» զեկույցի համար որպես հիմք հանդիսացել են իրականացված մոնիթորինգի արդյունքները, որոնց շրջանակներում իրականացվել են հարցազրույցներ զորակոչիկների և նրանց հարազատների շրջանում: Նշվեց, որ որպես տեղեկատվության աղբյուր հանդիսացել են նաև հեռուստաընկերությունների միջոցով կազմակերպված ուղիղ եթերները:
  Ա. Սաքունցը կարևորեց, որ մոնիթորինգի ընթացքում բացահայտվել են մի շարք խնդիրներ՝ կապված բուժզննության ընթացակարգի, բուժզննության եզրակացության տրամադրման հետ:
  Մոնիթորինգի արդյունքները ցույց են տվել, որ այն ազդեցություն է ունենում զորակոչի ընթացքի վրա:
  Մոնիթորինգի արդյունքում մշակվել են առաջարկություններ, որոնցից հատկապես կարևորվել է իրազեկումը զորակոչիկներին իրենց իրավունքների և պարտականությունների վերաբերյալ, այդ թվում առաջարկվել է նաև հստակեցնել զորակոչի ժամանակ պահանջվող փաստաթղթերի ցանկը, բուժզննության հանձնաժողովի եզրակացության տրամադրումը զորակոչիկներին:
  Ներկայացվեց նաև «Մարդու իրավունքների վիճակը Լոռու մարզում 2008 թ-ին» զեկույցը: Զեկույցը հնարավորություն է տալիս հասարակությանը հստակ պատկերացում ունենալ Հայաստանի Հանրպետությունում մարդու իրավունքների վիճակի վերաբերյալ:
  Մասնակիցները հնարավորություն ունեցան հարցեր ուղղել գրասենյակի ղեկավարին, որոնք հիմնականում առնչվում էին զորակոչի ընթացքում առկա կոռուպցիոն ռիսկերին, մոնիթորինգի արդյունքներին:
  «Եկեք օգնենք մեր հասարակությանը և հասնենք նրան, որ առնվազն հիվանդ երեխան չհայտնվի զինված ուժերում» ամփոփեց հանդիպումը Ա. Սաքունցը: