Անվճար իրավախորհրդատվություն Ստեփանավան, Ալավերդի, Տաշիր և Սպիտակ քաղաքներում

2009թ. ապրիլ ամսին Հելսինկյան Քաղաքացիական Ասամբլեայի Վանաձորի գրասենյակի Ստեփանավանի, Ալավերդու, Տաշիրի և Սպիտակի կենտրոններ անվճար իրավախորհրդատվություն ստանալու համար դիմել են 6 քաղաքացիներ:

Այսպես, ՀՔԱ Վանաձորի գրասենյակի Լոռու մարզի Ստեփանավան, Ալավերդի, Տաշիր և Սպիտակ քաղաքների կենտրոններ քաղաքացիները դիմել են հետևյալ հարցերով.
  Սպիտակ
  Սեփականության իրավունք
  1. Գյուղապետարանը մերժել է քաղաքացուն ընդգրկել երկրաշարժի հետևանքով անօթևան մնացած բնակիչների հերթացուցակում` պատճառաբանելով, որ Հայաստանի ազգային արխիվի Սպիտակի տարածքային ներկայացուցչի տրամադրած արխիվային տեղեկանքում առկա է սխալ: Քաղաքացին ինչպե՞ս կարող է ընդգրկվել երկրաշարժի հետևանքով անօթևան մնացած բնակիչների հերթացուցակում:
  Տրամադրված աջակցությունը
  Քաղաքացու համար կազմակերպության կողմից պատրաստվել է գրավոր դիմում` ուղղված ՀՀ նախագահի վերահսկողական ծառայությանը` քաղաքացուն` երկրաշարժի հետևանքով անօթևան մնացած բնակիչների հերթացուցակում ընդգրկելու խնդրանքով` միաժամանակ ներկայացնելով արխիվային ճշգրտված տեղեկությունները:
  Տաշիր
  Ընտանեկան իրավունք
  2. Հաշմանդամության խումբ ունեցող չափահաս երեխան կարո՞ղ է արդյոք ապրուստի միջոց` ալիմենտ ստանալ, եթե ծնողներն ամուսնալուծված են:
  ՀՀ ընտանեկան օրենսգրքի համաձայն` ծնողներից մեկի խնամքին հանձնված չափահաս, հաշմանդամության խումբ ունեցող երեխայի համար խնամառու ծնողը կարող է ալիմենտ պահանջել մյուս ծնողից:
  Աշխատանքային իրավունք
  3. Քաղաքացին աշխատել է հիվանդանոցում որպես բուժքույր: 2008թ. հունիսին մեկ ամսով անցել է վճարովի արձակուրդի, այնուհետև նույն թվականին ցանկացել է նորից արձակուրդի անցնել իր հաշվին: Հիվանդանոցի տնօրենը մերժել է, և քաղաքացին ստիպված աշխատանքից ազատման դիմում է ներկայացրել: Իր փոխարեն աշխատանքի են ընդունել մեկ ուրիշ մասնագետի: Քաղաքացին ինչպե՞ս կարող է վերականգնվել իր նախկին աշխատանքում:
  ՀՀ աշխատանքային օրենսգրքի համաձայն` ազատման դիմում ներկայացրած քաղաքացու աշխատանքից հեռացումը չի դիտվում որպես աշխատանքային իրավունքի խախտում, հետևաբար քաղաքացին չի կարող վերականգնվել իր նախկին աշխատանքում:
  Ստեփանավան
  Դատավարական իրավունք
  4. ՀՀ տնտեսական դատարանի կողմից անօրինական վճիռ է կայացվել, որով խախտվել է քաղաքացու սեփականության իրավունքը: Քաղաքացին ի՞նչ կարգով և ի՞նչ ժամկետներում կարող է բողոքարկել վճիռը:
  Քաղաքացուն բացատրվել է, որ վճիռը բողոքարկելու հնարավորություն չկա, քանի որ բողոքարկման ժամկետները սպառվել են:
  Սեփականության իրավունք
  5. Սեփականության իրավունքով քաղաքացուն պատկանող հողամասը, տնակը առանց որևէ իրավական ձևակերպման և թույլտվության օգտագործվում է մեկ այլ քաղաքացու կողմից: Քաղաքացին դիմել է համայնքի ղեկավարին, սակայն որևէ աջակցություն չի ստացել: Քաղաքացին ինչպե՞ս կարող է վերականգնել հողամասի և տնակի նկատմամբ տնօրինման, տիրապետման և օգտագործման իր իրավունքը:
  Տրամադրված աջակցությունը
  Քաղաքացու համար պատրաստվել է գրավոր դիմում` ուղղված ոստիկանությանը` քաղաքացու սեփականության իրավունքի պաշտպանությանն աջակցելու խնդրանքով:
Դրական արդյունքի բացակայության դեպքում հարևանի անօրինական գործողությունները կբողոքարկվեն դատական կարգով:
  Ալավերդի
  Քաղաքացիության իրավունք
  6. Օտարերկրյա քաղաքացիներն ինչպե՞ս կարող են ՀՀ քաղաքացիություն ձեռք բերել:
  ՀՀ քաղաքացիություն ձեռք բերելու համար անհրաժեշտ է դիմում ներկայացնել ՀՀ նախագահի անունով` կից ներկայացնելով հետևյալ փաստաթղթերը. դիմում, դիմում-հարցաթերթիկ, անձնագրի, ծննդյան վկայականի, ամուսնության վկայականի նոտարական կարգով վավերացրած պատճեններ, տեղեկանք առողջական վիճակի մասին, տեղեկանք, որ դատապարտված չի եղել, աշխատանքային գործունեության մասին փաստաթուղթ, հայկական ծագումը վկայող փաստաթուղթ, եթե ծագումով հայ է: