«Հայ-թուրքական միջսահմանային համագործակցություն»

2008թ. նոյեմբերի 29-ին Վանաձորում տեղի ունեցավ միջազգային կոնֆերանս «Հայ-թուրքական միջսահմանային համագործակցություն. հնարավոր նախաձեռնություններ Հայաստանի եւ Թուրքիայի կողմից» թեմայով:

Կոնֆերանսին, որը կազմակերպվել էր «Գլոբալիզացիայի եւ տարածաշրջանային համագործակցության վերլուծական կենտրոնի» կողմից, մասնակցում էին փորձագետներ, դասախոսներ,ուսանողներ, հասարակական կազմակերպությունների ներկայացուցիչներ, քաղաքացիներ:
  Զեկույցով հանդես եկան «ARI» շարժման անդամ, Կանանց լիդերության կենտրոնի համակարգող Օզգյուլ Երդեմլի Մութլուն,Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը, «Turkish Policy Quarterly» ամսագրի գլխավոր խմբագիր Դիբա Նիգար Գոկսելը, «Գլոբալիզացիայի եւ տարածաշրջանային համագործակցության վերլուծական կենտրոն»հ/կ վարչության նախագահ Ստեփան Գրիգորյանը:
  Հանդիպման նպատակն էր` փոխել Հայաստանում եւ Թուրքիայում ձեւավորված կարծրատիպերը` ստեղծելով նոր հարաբերություններ եւ արդյունավետ համագործակցություն ազգերի միջեւ:
  Հանդիպման սկզբում փորձագետները ներկայացրեցին Հայաստանում եւ Թուրքիայում առկա իրավիճակը, արտահայտեցին տարբեր տեսակետներ:
  «Լավագույն քաղաքականությունը` ազնվությունն է ժողովուրդների համար, վերագնահատելով փաստերը` մեր երկու ժողովուրդները պետք է ունենան բարիդրացիական հարաբերություններ»,-նշեց Վանաձորի քաղաքապետի խորհրդական Խորեն Գասպարյանը:
  Հանդիպման ընթացքում փորձագետները խոսեցին Հայաստանում եւ Թուրքիայում առկա սահմանային, մշակութային, քաղաքական եւ այլ հիմնախնդիրների մասին:
  «Անվտանգությունը պետք է տեսնենք սահմանների բաց լինելու մեջ:
Չկա խոսքի ազատություն, կարծիքի արտահայտման ազատություն մեր երկու երկրներում, որը վերաբերում է ազգային փոքրամասնություններին, որը շատ կարեւոր խնդիր է»,- նշեց Արթուր Սաքունցը:
  Կարեւորվեց նաեւ երկու ազգերի երիտասարդների փոխհարաբերությունների կարգավորումը, քանի որ վերջիններս կոնֆլիկտի հանգուցալուծման մեջ շարժիչ ուժ են հանդիսանում:
  Հանդիպման ընթացքում եղավ ազատ քննարկում, մտքերի փոխանակում:
  Հյուրերի կողմից հնչեցին հարցեր, որոնք վերաբերում էին հայ- թուրքական, հայ-ադրբեջանական հարաբերություններին, առկա միջսահմանային խնդիրներին:
  «Պետք է ստեղծել գաղափարների ազատ շուկա, որտեղ բոլորը կարող են համոզել մեկ մեկու, ստեղծել նոր պատմություն»,- վերջում կարեւորեց Դիբա Նիգար Գոկսելը: