Աշխատանքային քննարկում գարնանային զորակոչի մոնիտորինգի արդյունքների վերաբերյալ

2008թ նոյեմբերի 21-ին Հելսինկյան Քաղաքացիական Ասամբլեայի Վանաձորի գրասենյակում «Քաղաքացիական վերահսկողության ձեւավորումը զորակոչի գործընթացի նկատմամբ» ծրագրի շրջանակներում տեղի ունեցավ աշխատանքային քննարկում:

Քննարկմանը մասնակցում Էին` ՀՔԱ Վանաձորի գրասենյակի ղեկավար Արթուր Սաքունցը,ՀՀ ԶԿ զորակոչի բաժնի պետ` Գագիկ Հարությունյանը, Տաշիրի զորակոչային բաժանմունքի պետ` Գեորգի Հարությունովը, Ստեփանավանի զորակոչային բաժանմունքի պետ` Ժիրայր Կարապետյանը, Թումանյանի զորակոչային բաժնի պետ` Կամո Երկնափեշյանը, Վանաձորի զորակոչի բաժնի պետ Միշա Աբգարյանը, զորակոչի խմբի պետ Արեն Սարգսյանը, Սպիտակի զինվորական կոմիսար Սպարտակ Ղուբաթյանը եւ Լոռու մարզպետի խորհրդական Սարգիս Գալստյանը:
  Հանդիպման նպատակն էր` ամփոփել 2008թ. Լոռու մարզում գարնանային զորակոչի մոնիթորինգի արդյունքները, քննարկել զորակոչի ընթացքում առաջացող խնդիրները եւ գտնել դրանց լուծման առավել արդյունավետ ուղիներ:
  Հանդիպման սկզբում Արթուր Սաքունցը ներկայացրեց իրականացվող ծրագրի խնդիրները, մասնավորպես բուժզննության անցկացման ընթացակարգը, զորակոչիկների իրավունքների եւ պարտականությունների իրազեկման մակարդակի ուսումնասիրությունը, զորակոչը կարգավորող օրենսդրության վերլուծությունը:
  «Մենք ևս կարևորում ենք զորակոչիկների իրազեկված լինելը: Մեր հասարակության ամբողջ պատկերը երեւում է բանակում: Օրենք չիմանալը քաղաքացու կողմից իրեն չի ազատում պարտականության կատարումից»,- նշեց ՀՀ ԶԿ զորակոչային բաժնի պետը:
  Հանդիպման ընթացքում քննարկվեցին զորակոչիկների կցագրման, ծանուցման, բուժզննության կազմակերպման, տարկետման, քաղաքացիության եւ տեղեկատվության ազատության վերաբերյալ խնդիրները: Քննարկվեց նաեւ հետագա անելիքները:
  «Ծրագրի գաղափարը բավականին հուսադրող է, քանի որ խնդիրը լուծելու համատեղ նպատակ ունենք»,- նշեց Արթուր Սաքունցը:
  Քննարկման վերջում կարեւորվեց վերհանված խնդիրների վերաբերյալ երկկողմանի մոտեցումը, որպեսզի ուսումնասիրությունը ավելի արդյունավետ, օբյեկտիվ եւ կանխատեսելի լինի:
«Քաղաքացիական Վերահսկողության ձեւավորումը զորակոչի գործընթացի նկատմամբ» ծրագիրն իրականացվում է Հելսինկյան Քաղաքացիական Ասամբլեայի Վանաձորի գրասենյակի կողմից Բաց Հասարակության Ինստիտուտի աջակցության հիմնադրամ-Հայաստանի գրասենյակի ֆինանսական օժանդակությամբ: