Իրավական աջակցություն թմրամիջոց գործածողներին

2008թ. նոյեմբերի 15-ին Ստեփանավանի «Ֆորտունա» հեռուստաընկերության ուղիղ եթերով տեղի ունեցավ «Իրավական աջակցություն թմրամիջոց գործածողներին» ծրագրի շրջանակներում կազմակերպված 1-ին ուղիղ հեռուստաեթերը:

Եթերի հյուրը ՀՔԱ Վանաձորի գրասենյակի ղեկավար Ա. Սաքունցն էր, որը ներկայացրեց իրականացվող ծրագրի նպատակը, մատուցվող ծառայությունները, թմրամիջոցների ապօրինի շրջանառության համար օրենսդրությամբ սահմանված պատասխանատվության միջոցները և վերջին օրենսդրական փոփոխությունները:
  Եթերի ընթացքում հեռուստադիտողները կարողացան ուղիղ հեռախոսակապի միջոցով ստանալ իրենց հուզող հարցերի պատասխանները:
  Հեռուստադիտողներին հետաքրքրում էր, թե արդյո՞ք թմրամիջոցներից կախվածության բուժման համար անհրաժեշտ է մասնագետի միջամտություն: Ա. Սաքունցը պատասխանեց, որ անհրաժեշտ է, քանի որ ֆիզիկական կախվածության բուժումից բացի, անհրաժեշտ է նաև հոգեբանական կախվածության բուժում, որը բավական մեծ ժամանակ է պահանջում:
  Հեռուստադիտողների մյուս հարցը վերաբերում էր թմրամիջոցից կախվածություն ունեցող անձանց ազդեցությանը շրջապատի անձանց վրա: Այս կապակցությամբ Ա. Սաքունցը նշեց, որ թմրամիջոց գործածող անձանց ազդեցության տակ ավելի շատ ընկնում են այն մարդիկ, ում իրազեկվածությունը ցածր է թմրամիջոցի գործածման հետևանքների վերաբերյալ: «Այս տեսակետից ավելի խոցելի են սոցիալապես անապահով ընտանիքները, որտեղ բացի բազմաթիվ խնդիրների առկայությունը, նաև կրթական մակարդակն է ցածր»,- նշեց Ա. Սաքունցը:
  Կարևոր է նաև օրենսդրության վերաբերյալ հասարակության իրազեկման մակարդակի բարձրացումը, որին էլ ուղղված են կազմակերպվող ուղիղ հեռուսատաեթերները:
  «Քրեական օրենսգրքում ամրագրված է, որ թմրամիջոցները կամովին հանձնելու դեպքում անձն ազատվում է պատասխանատվությունից, բայց 2006 և 2007 թվականներին որևէ նման դեպք չի արձանագրվել»,- հեռուստադիտողներին տեղեկացրեց Արթուր Սաքունցը:
  Երրորդ հեռուստադիտողը հետաքրքրվում էր, թե ինչու՞մ է կայանում թմրամիջոց գործածողների և ալկոհոլիզմով տառապողների բուժման տարբերությունը:
  Արթուր Սաքունցը գտնում է, որ թմրամիջոցն ավելի մեծ հոգեկան կախվածություն է առաջացնում, քան ալկոհոլը: Այս պատճառով էլ ալկոհոլից կախվածությունը հնարավոր է բուժել ավելի կարճ ժամանակում, քան թմրամիջոցից կախվածությունը:
  «Որ՞ն է թմրամիջոցի գործածումից հետ կանգնելու առաջին քայլը» հարցին ի պատասխան Ա. Սաքունցը ներկայացրեց իր մոտեցումը, համաձայն որի՝ առաջին քայլը պետք է լինի աջակցելը, հոգատար, խելացի վերաբերմունքը: Բայց պետք է հիշել նաև, որ կախվածությունը միանգամից չի առաջանում, ուստի պետք է նախապես գիտակցել հետևանքները:
  Ուղիղ հեռուստաեթերն իրականացվում էր «Իրավական աջակցություն թմրամիջոց գործածողներին» ծրագրի շրջանակներում, որը մեկնարկել է 2008թ-ի հոկտեմբերի 1-ից Հելսինկյան Քաղաքացիական Ասամբլեայի Վանաձորի գրասենյակի կողմից: Ծրագիրը թմրամիջոց գործածողների իրավունքների պաշտպանությանն ուղղված պիլոտային ծրագրի շարունակությունն է, որը, շարունակվելով, ընդգրկում է ոչ միայն Վանաձորը, այլ Լոռու մարզի Ալավերդի ու Ստեփանավան քաղաքները:
  Ծրագրի նպատակը անվճար իրավական աջակցության ցուցաբերումն է թմրամիջոց գործածող անձանց:
  Ծրագրի ուղղություններից են թմրամիջոց գորածողներին անմիջական իրավաբանական խորհրդատվության տրամադրումը, նրանց դատական պաշտպանությունը: Երրորդ ուղղությունը նրանց նկատմամբ հարուցված քրեական և վարչական գործերով դատավարությունների մոնիթորինգն է, քանի որ ուսումնասիրությունները ցույց են տալիս, որ դատական պրոցեսների ժամանակ մարդու իրավունքների խախտումը համակարգային բնույթ ունի: