ԸՆԴՈՒՆՈՂ ՀԱՆՁՆԱԺՈՂՈՎԻ ԱՆԴԱՄԻՆ ԲՌՆԵԼ ԵՆ

Օրերս Լոռու մարզային վարչություն էր դիմել մի քաղաքացի և հայտնել, որ Վանաձորի Պետական Մանկավարժական ինստիտուտի աշխատակիցներից մեկը, իր դստեր ընդունելության քննությունների միավորները բարձրացնելու նպատակով, իրենից պահանջել է 1000 դոլար կաշառք:

Ինչպես տեղեկացանք ոստիկանության պաշտոնական կայքէջից, ոստիկանության ԿՀԴՊ գլխավոր, Լոռու մարզային վարչությունների և Վանաձորի բաժնի աշխատակիցների ձեռնարկած օպերատիվ-հետախուզական միջոցառումների արդյունքում` 700 դոլար կաշառք վերցնելու պահին, մերկացվել է հիշյալ ինստիտուտի ընդունող հանձնաժողովի տեխնիկական քարտուղար Հասմիկ Մելիքյանը:
  Մելիքյանն իր բջջային հեռախոսից զանգահարել էր ընդունելության քննություններին մասնակցած երեխաների ծնողներին և պահանջել կաշառք տալ, այլապես` երեխաները դուրս կմնան մրցույթից:
  Հավելենք նաև, որ ոստիկանների օգնությանն էին դիմել Լոռու մարզի ևս երեք քաղաքացիներ:
  Պարզվել է, որ օգոստոսի 7-ին և 8-ին Հասմիկ Մելիքյանը նմանօրինակ ճանապարհով նրանցից պահանջել և ստացել էր 1000-ական դոլար կաշառք և այդ գումարներն ամբողջությամբ փոխանցել նույն ինստիտուտի ընդունող հանձնաժողովի պատասխանատու քարտուղար Ռաֆիկ Կռոյանին: Վերջինս խոստովանել է, որ գնահատականները բարձրացնելու նպատակով Հասմիկ Մելիքյանն իրեն է փոխանցել 3000 դոլար կաշառքը:
  Փաստի առթիվ Հայաստանի Հանրապետության քրեական օրենսգրքի 311 հոդվածի 3-րդ մասով ոստիկանության Լոռու մարզային քննչական բաժնում հարուցվել է քրեական գործ:
  Նախաքննությունը շարունակվում է: Հասմիկ Մելիքյանը և Ռաֆիկ Կռոյանը կալանավորված են:
  ԱՂԲՅՈՒՐԸ՝
http://www.panorama.am/am/law/2008/08/12/police/