Երեք տարի ազատազրկում՝ զանգվածային անկարգություներ կատարելու ու թմրամիջոց գործածելու համար

Վանաձորցի Ստեփան Սարգսյանը դատապարտվեց երեք տարվա ազատազրկման:

Հայաստանի Հյուսիսային քրեական դատարանի Վանաձորի նստավայրում նա ընդունեց իր մեղքը՝ այդ կերպ մեղմացնելով հանցանքի համար նախատեսված պատժաչափը:
  21-ամյա Սարգսյանը մեղադրվում է ՀՀ Քրեական օրենսգրքի 225 հոդվածի երկրորդ եւ 271 հոդվածի առաջին մասերով՝ զանգվածային անկարգություններ կատարելու եւ թմրամիջոցներ գործածելու համար: Այս արարքների համար, ինչպես նշեց դատավոր Վոլոդյա Ղազարյանը, նա ենթակա է 10 տարվա ազատազրկման:
  Մինչդեռ մեղքի ընդունմամբ անցկացված արագացված դատավարությամբ նա բանտում կանցկացնի 3 տարի:
Սարգսյանը լիովին զղջաց՝ ընդունելով, որ մարտի 1-2-ը մասնակցելով ընդդիմության կազմակերպած հանրահավաքներին Երեւանի քաղաքապետարանի մոտ՝ բռնություն գործադրելու սպառնալիքներ է հնչեցրել ոստիկանության Լոռու մարզային վարչության աշխատակիցների նկատմամբ, հայհոյել է նրանց եւ չկարողանալով ոստիկաններին դուրս հանել մեքենայից՝ մի քանի ցուցարարների հետ հարվածել է ավտոմեքենան բութ առարկաներով:
  Ոստիկանության ավտոմեքենային հասցված նյութական վնասը կազմել է 157.000 դրամ:
Սահմանափակ մտածելակերպով պրիմիտիվ անձ՝ աֆեկտիվ անկայունությամբ բնութագրվող երիտասարդը մեղադրվում է նաեւ փետրվարի 13-ից մարտի 3-ն ընկած ժամանակահատվածում քննությամբ չպարզված անձից գործածման նպատակով ապօրինաբար ձեռք բերելու եւ առանց բժշկի թույլտվության թմրամիջոց օգտագործել համար:

Դատավարության ընթացքում, երբ Լոռու մարզի դատախազ Կարեն Շահբազյանը ներկայացնում էր մեղադրանքը, Ստեփանը տարակուսանքով էր լսում հատկապես թմրամիջոցի եւ ոստիկանների նկատմամբ հնչեցրած հայհոյանքների մասին:
Այսուհանդերձ, նա ընդունեց, որ կատարել է իրեն մեղսագրվող արարքները, որ ՀՀՇ Վանաձորի կառույցի ղեկավար Աշոտ Մանուկյանը հավաքագրել է նաեւ իրեն՝ իշխանափոխության ժամանակ նրան խոստանալով խանութ Երեւանում եւ տարել հանրահավաքների: Ստեփանը ընդդիմության հանարահավաքներին մասնակցել է փետրվարի 28-ից, ներկա է եղել «Ազատության» հրապարակում մարտի 21-ի առավոտյան դեպքերին, որոնցից հասցրել է փախչել:
  Նրա մայրը նիստից հետո եւս տարակուսանք հայտնեց՝ համոզմունք հայտնելով, ոի «ծեծել են», դրա համար էլ նման ցուցմունքներ է տվելե:
Նաիրա Բուլղադարյան