ՔԱՂԱՔԱՑԻԱԿԱՆ ՀԱՆՁՆԱԺՈՂՈՎ

Հայաստանի մի շարք հասարակական կազմակերպություններ հանդես են եկել Երևանի մարտի 1-2-ի իրադարձություններն ուսումանսիրելու քաղաքացիական հանձնաժողով ստեղծելու առաջարկով, տեղեկացնում է Նովոստի-Արմենիա գործակալությունը:

Հանձնաժողովի նախաձեռնողների խմբում, մասնավորապես, ընդգրկված են Հելսինկյան Քաղաքացիական Ասամբլեայի Վանաձորի գրասենյակը, Միջնաբերդ հասարակական կազմակերպությունը, Տրանսպարենսի Ինտերնեշնլը:
  «Հայաստանում ժողովրդավարական ինստիտուտների վերաբերյալ ԵԽԽՎ 1609-րդ բանաձևի պահանջների կատարումը ոչ միայն Հայաստանի պետական մարմինների, այլև քաղաքացիական հասարակության խնդիրն է», ասել է Հելսինկյան Քաղաքացիական Ասամբլեայի Վանաձորի գրասենյակի նախագահ Արթուր Սաքունցը:
  Սաքունցը նշել է, որ իրադարձությունների ուսումնասիրությունից հետո քաղաքացիական հանձնաժողովը կկազմի և կհրապարակի այլընտրանքային զեկույց:
  «Քաղաքացիական հասարակության ներկայացուցիչներից կազմված հանձնաժողովը մտադիր է մարտի սկզբի իրադարձությունների և հետագա գործընթացների մասին միասնական տեղեկատվական բազա ստեղծել»-, ասել է նա:
  Սաքունցի խոսքով՝ նախօրեին ձևավորված ժամանակավոր խորհրդարանական հանձնաժողովը չի կարող օբյեկտիվորեն ուսումնասիրել մարտյան իրադարձությունները: «Հանձնաժողովի կազմում ընդգրկվել են մարդիկ, որոնց լուռ համաձայնությամբ տեղի ունեցան մարտյան իրադարձությունները, կամ էլ նրանք գործուն մասնակցություն են ունեցել այդ իրադարձություններին»-, կարծում է նա:

ԱՂԲՅՈՒՐԸ՝
http://www.lragir.am/src/index.php#top