Թմրամիջոց գործածողների իրավական աջակցությունը շարունակվելու է

2008թ. ապրիլի 25-ին Երևանում տեղի ունեցավ կլոր սեղան, որի ժամանակ քննարկվեցին թմրամիջոց գործածող քաղաքացիների խնդիրները:

Կլոր սեղանը կազմակերպվել էր ՀՔԱ Վանաձորի գրասենյակի կողմից իրականացվող «Իրավական աջակցություն Վանաձորի թմրամիջոց գործածող քաղաքացիներին» ծրագրի շրջանակներում:
  Ծրագիրն ընդգրկել է Վանաձորում թմրամիջոց գործածող քաղաքացիների և նրանց ընտանիքների խնդիրների ուսումնասիրություն, հասարակական իրազեկում, իրավական աջակցություն:
  Քննարկման ժամանակ ՀՔԱ Վանաձորի գրասենյակի աշխատակիցները թմրամիջոց գործածողների խնդիրներով զբաղվող այլ հասարակական կազմակերպություններին ներկայացրեցին իրականացված ծրագրի արդյունքները:
  Վանաձորում բացահայտվել են 53 թմրամիջոց գործածողների և նրանց 44 ընտանիքների անդամների խնդիրները՝ առողջապահության, զբաղվածության ոլորտներում, իրավապահ մարմինների հետ հարաբերություններում: Այդ խնդիրները պարբերաբար ներկայացվել են վանաձորցիներին տեղական «Լոռի» հեռուստաընկերության եթերով:
  Ծրագրի իրականացման ընթացքում թմրամիջոց գործածողներին տրամադրվել է անվճար իրավաբանական խորհրդատվություն, կատարվել է դատավարությունների մոնիթորինգ:
  Թմրամիջոց գործածողների իրավական աջակցության նպատակով մշակվել է նաև համապատասխան իրավական ուղեցույց: Ուղեցույցը ներառում է այն բոլոր տեղեկությունները, որոնք անհրաժեշտ են թմրամիջոց գործածողներին՝ իրավապահ մարմիններում որպես վկա, կասկածյալ, մեղադրյալ հանդես գալու ժամանակ:
  Քննարկման ընթացքում մասնակիցներին ներկայացվեցին նաև թմրամիջոց գործածողների իրավունքների պաշտպանության բնագավառում նախատեսվող հետագա անելիքները: Ներկաների կողմից եղան առաջարկություններ՝ թմրամիջոց գործածողների իրավունքների պաշտպանությունն առավել արդյունավետ դարձնելու վերաբերյալ:
  ՀՔԱ Վանաձորի գրասենյակը նախատեսում է շարունակել թմրամիջոց գործածողների իրավունքների պաշտպանության նպատակով իրականացված ծրագիրը:
  ՀՔԱ Վանաձորի գրասենյակի կողմից «Իրավական աջակցություն Վանաձորի թմրամիջոց գործածողներին» ծրագիրն իրականացվել է 2007թ. հոկտեմբերի 1-ից 2008թ. մայիսի 1-ը՝ Բաց հասարակության ինստիտուտի օժանդակության հիմնադրամի աջակցությամբ:
  Իրականացված ծրագրի, դրա արդյունքների վերաբերյալ մանրամասն տեղեկություններ ստանալու համար կարող եք դիմել ՀՔԱ Վանաձորի գրասենյակ՝ Ելենա Սարգսյանին:
  Հասցեն՝
  ք. Վանաձոր, Տիգրան Մեծի 59, հեռ.՝ 0322 4 22 68,
  ինտերնետային կայք՝ www.hcav.am, www.hrlori.am