Իրազեկում արտակարգ պայմաններում

2008թ. մարտի 4-ին ՀՔԱ Վանաձորի գրասենյակի ղեկավար Արթուր Սաքունցը հրավիրել էր մամլո ասուլիս՝ «Հասարակական այլընտրանքային իրազեկում արտակարգ դրության պայմաններում»:

ՀՔԱ Վանաձորի գրասենյակի ղեկավար Արթուր Սաքունցը գտնում է, որ ՀՀ նախագահ Ռոբերտ Քոչարյանի հրամանագիրը՝ «Երևան քաղաքում մինչև 2008թ. մարտի 20-ը արտակարգ դրություն հայտարարելու մասին» հակաօրինական է:

Նա հիմնավորում է իր կարծիքը նրանով, որ ՀՀ-ում չկա արտակարգ դրության մասին օրենք:
Միևնույն ժամանակ արտակարգ դրության վիճակը խախտում է խոսքի ազատության իրավունքը, սահմանափակում խաղաղ ցույցերի, երթերի կազմակերպման հնարավորությունը նաև Երևանից դուրս՝ մարզերում:
  Օրինակ՝ Վանաձորի քաղաքապետն իր 04 մարտի, 2008թ. թիվ 260 որոշմամբ արգելել է ՀՔԱ Վանաձորի գրասենյակին մարտի 6-8-ը Վանաձորի «Արցախ» պուրակում կազմակերպել հանրահավաք: Քաղաքապետն հիմք է ընդունել ՀՀ մայրաքաղաք Երևանում մարտի 1-ին տեղի ունեցած ընդհարումները և գտել, որ կազմակերպվող հանրահավաքը կարող է Վանաձորում ևս հանգեցնել անկանխատեսելի և մարդկանց կյանքին ու առողջությանը վտանգ սպառնացող հետևանքների: Ընդ որում՝ առաջին անգամ քաղաքապետը նման որոշում կայացնելու նպատակով հրավիրել էր նաև Վանաձորում գործող շուրջ 8 այլ ՀԿ-ների, Լոռու մարզի դատախազության և ՀՀ ոստիկանության Լոռու մարզի վարչության ներկայացուցիչների:
Արթուր Սաքունցը գտնում է, որ այս որոշման հիմնավորումն իրական չէ: Կազմակերպվող հանրահավաքը նպատակ է հետապնդում տեղեկատվություն տրամադրել վանաձորցիներին Հայաստանում տիրող իրավիճակի մասին: Քաղաքացիներին այս եղանակով իրազեկելը բացատրվում է նրանով, որ այլընտրանքային լրատվամիջոցների գործունեությունը Երևանում դադարեցված է: Սա հնարավորություն չի տալիս բնակչությանը լիարժեքորեն տեղեկացված լինել հայաստանյան ներկա վիճակին:
  Օրինակ՝ Լոռու մարզի և հատկապես Վանաձորի քաղաքացիները քիչ տեղեկատվություն ունեն մարտի 1-ից հետո ոստիկանության գործողությունների մասին:
Ոստիկանության աշխատակիցներն առանց որևէ տեղեկատվություն տրամադրելու բերման են ենթարկում քաղաքացիներին, ոստիկանությունում նրանց պահում միջինը 5 ժամ:
  Ոստիկանությունում քաղաքացիներին պահելու և նրանց իրավական կարգավիճակի մասին տեղեկատվություն ոստիկանության աշխատակիցները չեն տրամադրում նույնիսկ նրանց հարազատներին: ՀՔԱ Վանաձորի գրասենյակը Լոռու մարզում այս եղանակով ոստիկանություն բերման ենթարկված մոտ 11 քաղաքացիների վերաբերյալ հստակ տեղեկատվություն ունի:
  «Քաղաքացիները Հայաստանում տիրող իրավիճակի մասին կարող են տեղեկատվություն ստանալ մեր գրասենյակից՝ այցելելով կամ զանգահարելով»,-եզրափակեց Արթուր Սաքունցը: