«ՄԱՐԴԻԿ ԱՊՍՏԱՄԲԵԼՈՒ ԻՐԱՎՈՒՆՔ ՈՒՆԵՆ»

«Պետությունը պետք է պաշտպանի մարդու իրավունքները, այդ թվում ազատ տեղաշարժի, հանրահավաքների իրավունքը, ազատ միավորումների ազատությունը, խոսքի ազատությունը, կարծիքի արտահայտման իրավունքը:
Եվ եթե այդ ամենը պետությունը չի ապահովում, ապա պետությունը ֆիքսվում է որպես բռնապետություն եւ մարդը իրավունք ունի ապստամբելու եւ բռնապետության եւ ճնշումների դեմ»

- «Ա1+»-ին տված հարցազրույցում ասել է Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
  Իր ասածը հիմնավորելու համար Արթուր Սաքունցը մեջբերում է «Մարդու իրավունքների միջազգային բիլլ»-ի նախաբանի երրորդ պարբերությունը. «Անհրաժեշտ է օրենքի իշխանությամբ պաշտպանել մարդու իրավունքները, որպեսզի նա, որպես վերջին միջոց, հարկադրված չընդվզի բռնակալության ու ճնշման դեմ» եւ ավելացնում. «Այսօր ժողովրդի միակ տարբերակը ընդվզումն ու ապստամբելն է: Եւ ինչքան էլ դա անվանեն իշխանության զավթման փորձ, իշխանությունն իրենք արդեն զավթել են, եթե անվանեն սահմանադրական կարգի դեմ բռնության փորձ, արդեն իրենք սահմանադրական կարգը խախտել են»:Ըստ նրա` ներկա ռեժիմը որեւէ գաղափար չունի, բացի «ուժային մեթոդների սնանկությունից», եւ անգամ մոռացվել է նախընտրական «Առաջ, Հայաստան» կարգախոսը:
  Արթուր Սաքունցը նաեւ տեղեկացնում է, որ այսօր Վանաձորի տարբեր հաստատությունների աշխատողներին վաղը ստիպելու են մասնակցել Երեւանում կայանալիք Սերժ Սարգսյանի հանրահավաքին:
  Արթուր Սաքունցը բոլորին կոչ է անում հարկադրաբար չգնալ: «Իսկ եթե աշխատանքից հեռացնե՞ն»,- «Ա1+»-ի դիտարկմանը` Արթուր Սաքունցը հակադարձեց. «Մեկին հեռացրեցին, երկուսին հեռացրեցին, հո՞ բոլորին չեն կարող հեռացնել»:
  Արդյո՞ք ՀՀ քաղաքացիները կարող են վստահ լինել, որ հայ իրավապաշտպանները կկարողանան պաշտպանել մարդկանց իրավունքները` այս հարցին Արթուր Սաքունցը պատասխանեց` անպայման եւ օրինակ է բերեց փետրվարի 21-ին տեղի ունեցած միջադեպը. «Վանաձորցիներին Երեւան հանրահավաքի բերող մարդկանց մեքենան կանգնացրել էին պետավտոտեսուչները ընդ որում առանց որեւէ հիմնավորման, քաղաքացիները ահազանգել էին մեզ, մենք արդեն դիմել ենք դատախազություն»: Ու այսօր, ըստ նրա, Երեւան չհասած քաղաքացիները պատրաստ են ցուցմունք տալ, որ իրենց ազատ տեղաշարժվելու իրավունքը ոտնահարվել է:
  ԱՂԲՅՈՒՐԸ՝
http://www.a1plus.am/am/
  ԻՐԱԶԵԿ ԵՂԵՔ ԸՆՏՐՈՒԹՅՈՒՆՆԵՐԻ ՄԱՍԻՆ ԱՎԵԼԻ ՄԱՆՐԱՄԱՍՆ
WWW.HRLORI.AM ՎԵԲ-ՊՈՐՏԱԼԻՑ