Ի՞նչ կարող ենք անել, կանչել են, եկել ենք…

2008թ-ի փետրվարի 16-ին Վանաձորի թիվ 9 դպրոցի տնօրեն Էդիտա Վարդանյանը ժամը 15:10-ին համադպրոցական ծնողական ժողով է հրավիրել: «Մեր թեկնածուն համար ութն է, ընտրություն կատարելիս ընտրեք համար ութը», - 80-100 ծնողի մասնակցությամբ ժողովում հայտարարել է նա:

Նույն բովանդակությամբ էլ դպրոցի տնօրենը, որը միաժամանակ հանդիսանում է նույն դպրոցի շենքում տեղակայված 30/18 ընտրատեղամասային հանձնաժողովի նախագահը՝ առաջադրված Հայաստանի հանրապետական կուսակցության կողմից, շարունակել է իր ելույթը:
  «Դեպի առաջընթաց և բարելավում, բոլոր ճանապարհները կապված են Հայաստանի հանրապետական կուսակցության և նրա թեկնածու Սերժ Սարգսյանի հետ»,- ասել է նա:
Նա մասնակիցներին տեղեկատվություն է տրամադրել ՀՀ նախագահի թեկնածուների մասին՝ ընդգծելով, թե նրանցից որի կողմից են բարձրացվել աշխատավարձերը, թոշակները, նպաստները: Հետո սկսել է հակաքարոզչություն անել մյուս թեկնածուների օգտին. «Արթուր Բաղդասարյանը դեռ սկսնակ է, նա չի կարող լավ նախագահ լինել Հայաստանի համար, եթե կարողանար, ԱԺ պատգամավորության ժամանակ մի բան կաներ»:
  Երբ նրա ելույթից հետո ՀՔԱ Վանաձորի գրասենյակի դիտորդները մոտեցել են նրան, փորձել պաշտոնական բացատրություն ստանալ հավաքի վերաբերյալ, տնօրենը սկզբում բացատրել է, որ պարզապես ծնողական ժողով է: Հետո, երբ դիտորդները տեղեկացրել են, որ իրենք ներկա են եղել հանդիպմանը և որակել հավաքը որպես նախընտրական քարոզչություն Սերժ Սարգսյանի օգտին, տնօրենը պատասխանել է.«Ես ուզում եմ, որ իմ և իմ աշակերտների ապագան լինի հուսալի ձեռքերում»:
  Ժողովին մասնակցած ծնողները դիտորդներին բացատրել են. «Դե կանչել են ծնողական ժողովի, եկել ենք, ի՞նչ կարող ենք անել»:

Դեպքի կապակցությամբ ՀՔԱ Վանաձորի գրասենյակը հաղորդում է ուղարկել Ոստիկանության Վանաձորի բաժին, թիվ 30 ընտրատարածքային հանձնաժողովին:

Թիվ 30 ընտրատարածքային հանձնաժողովի նախագահին
  Հարգելի պարոն Սայադյան

Մեր կազմակերպությունը 2008թ-ի նախագահական ընտրություններին դիտորդական առաքելություն իրականացնելու նպատակով հավատարմագրվել է Կենտրոնական ընտրական հանձնաժողովի կողմից:
  2008թ. փետրվարի 16-ին ժամը 15:00-ին թիվ 9-ը դպրոցի տնօերն Էդիտա Վարդանյանը ժամը 15:10-ին համադպրոցական ծնողական ժողով է հրավիրել: Հավաքին մասնակցել են նաև մեր կազմակերպության դիտորդները: Նրանք արձանագրել են, որ տնօրենը, որը միաժամանակ հանդիսանում է նույն դպրոցի շենքում տեղակայված 30/18 ընտրատեղամասային հանձնաժողովի նախագահը՝ առաջադրված Հայաստանի հանրապետական կուսակցության կողմից, նախընտրական քարոզչություն է իրականացրել ՀՀ նախագահի թեկնածու Սերժ Սարգսյանի օգտին: Էդիտա Վարդանյանն իր խոսքում մասնավորապես նշել է. «Մեր թեկնածուն համար ութն է, ընտրություն կատարելիս ընտրեք համար ութը»:
  Նշված միջոցառումը հանդիսանում է ՀՀ «Ընտրական օրենսգրքի» 18-րդ հոդվածի 4-րդ կետի 1-ին մասի խախտում, այն է՝ «պետական և տեղական ինքնակառավարման մարմիններին, ինչպես նաև դրանց աշխատակիցներին արգելվում է իրենց աշխատանքային պարտականությունները կատարելիս զբաղվել քարոզչությամբ»: Ինչպես նաև 18-րդ հոդվածի 4-րդ կետի 5-րդ մասով արգելվում է նախընտրական քարոզչությունն ընտրական հանձնաժողովների անդամներին: ՀՀ «Ընտրական օրենսգրքի» 139-րդ հոդվածով նման խախտումները պատասխանատվության են հանգեցնում:
  Գտնում ենք, որ վերը թվարկած խախումները էական ազդեցություն են թողնում 2008թ. նախագահական ընտրությունների արդյունքների վրա:
  Ուստի խնդրում ենք ձեռնարկել հրատապ միջոցառումներ նշված խախտումները վերացնելու և կանխարգելելու, ՀՀ օրենսդրությամբ սահմանված կարգով թիվ 9 դպրոցի տնօրեն Էդիտա Վարդանյանին պատասխանատվության ենթարկելու նպատակով:
  Հարգանքներով՝
կազմակերպության նախագահ Ա. Սաքունց

ՀՀ ոստիկանության Վանաձորի բաժնի պետին
   Հարգելի պրն Ա. Համբարյան
Մեր կազմակերպությունը 2008թ-ի նախագահական ընտրություններին դիտորդական առաքելություն իրականացնելու նպատակով հավատարմագրվել է Կենտրոնական ընտրական հանձնաժողովի կողմից:
  2008թ. փետրվարի 16-ին ժամը 15:00-ին թիվ 9-ը դպրոցի տնօերն Էդիտա Վարդանյանը ժամը 15:10-ին համադպրոցական ծնողական ժողով է հրավիրել: Հավաքին մասնակցել են նաև մեր կազմակերպության դիտորդները: Նրանք արձանագրել են, որ տնօրենը, որը միաժամանակ հանդիսանում է նույն դպրոցի շենքում տեղակայված 30/18 ընտրատեղամասային հանձնաժողովի նախագահը՝ առաջադրված Հայաստանի հանրապետական կուսակցության կողմից, նախընտրական քարոզչություն է իրականացրել ՀՀ նախագահի թեկնածու Սերժ Սարգսյանի օգտին: Էդիտա Վարդանյանն իր խոսքում մասնավորապես նշել է. «Մեր թեկնածուն համար ութն է, ընտրություն կատարելիս ընտրեք համար ութը»:
  Նշված միջոցառումը հանդիսանում է ՀՀ «Ընտրական օրենսգրքի» 18-րդ հոդվածի 4-րդ կետի 1-ին մասի խախտում, այն է՝ «պետական և տեղական ինքնակառավարման մարմիններին, ինչպես նաև դրանց աշխատակիցներին արգելվում է իրենց աշխատանքային պարտականությունները կատարելիս զբաղվել քարոզչությամբ»: Ինչպես նաև 18-րդ հոդվածի 4-րդ կետի 5-րդ մասով արգելվում է նախընտրական քարոզչությունն ընտրական հանձնաժողովների անդամներին: ՀՀ «Ընտրական օրենսգրքի» 139-րդ հոդվածով նման խախտումները պատասխանատվության են հանգեցնում:
  Ուստի խնդրում ենք ձեռնարկել հրատապ միջոցառումներ նշված խախտումները վերացնելու և կանխարգելելու համար՝ ՀՀ «Վարչական իրավախախտումների մասին օրենքի» 1401 հոդվածով սահմանված կարգով թիվ 9 դպրոցի տնօրեն Էդիտա Վարդանյանի նկատմամբ պատասխանատվություն կիրառելու միջոցով:
  Հարգանքներով՝
կազմակերպության նախագահ Ա. Սաքունց