ՀՔԱ Վանաձորի գրասենյակն իրականացնում է նախագահական ընտրությունների համակողմանի ուսումնասիրություն

2008թ. հունվարի 21-ից Հելսինկյան Քաղաքացիական Ասամլեայի Վանաձորի գրասենյակն իրականացնում է 2008թ. Նախագահական ընտրությունների համակողմանի ուսումնասիրություն Լոռու մարզում:

Նախագահական ընտրությունների նախընտրական քարոզչությունն իրականացնում են ՀՔԱ Վանաձորի գրասենյակի 16 կամավորները:
  Իրականացվող ուսումնասիրությունն ընդգրկում է.

 Լոռու մարզի 5 քաղաքների՝ Վանաձոր, Ալավերդի, Տաշիր, Ստեփանավան և Սպիտակ քաղաքների տեղական հեռուստաընկերությունների եթերի մոնիթորինգ 18:00-24:00-ն ընկած հատվածում և տեղական տպագիր մամուլի մոնիթորինգ:
 Նախագահի թեկնածուների կողմից իրականացվող նախընտրական քարոզչության մոնիթորինգ:
  Նախընտրական քարոզչության մոնիթորինգ իրականացնելու նպատակով կամավորների համար կազմակերպվել են 2 ուսուցանող սեմինարներ՝ «Նախագահական ընտրությունների նախընտրական քարոզչության ԶԼՄ մոնիթորինգ» և «Նախագահական ընտրությունների նախընտրական քարոզչության մոնիթորինգ»:
  «Նախագահական ընտրությունների նախընտրական քարոզչության ԶԼՄ մոնիթորինգ» սեմինարն իրականացրել է Գյումրիի «Ասպարեզ» լրագրողների ակումբի նախագահ Լևոն Բարսեղյանը: Լևոն Բարսեղյանը կամավորներին սովորեցրեց հեռուստաեթերի և տպագիր մամուլի մոնիթորինգի իրականացման մեթոդներն ու մեխանիզմները:
Դիտարկվելու են Սպիտակի «Սլավ-մեդիա», Ալավերդու «Անկյուն գումարած 3», Տաշիրի «Տաշիրք», Ստեփանավանի «Ֆորտունա» և Վանաձորի «Միգ TV», «ՎաԲա», «Լոռի TV» հեռուստալիքների եթերները, նաև «Վանաձորյան խճանկար», «Լոռու մարզ», «Քաղաքացիական նախաձեռնություն», «Իրավական մշակույթ», Սպիտակի «Սպիտակ», Ստեփանավանի «Ստեփանավան», «Տաշիրի «Աղարա» շաբաթաթերթերը:
Հաղորդումները դասակարգվելու են ըստ բնույթի՝ ակնհայտ պատվիրված գովազդի, ակնհայտ հակագովազդի, ենթադրյալ քաղաքական, բայց քողարկված անուղղակի գովազդի և ակնհայտ անկողմնակալ խմբագրական նյութեր: Հաշվի են առնվելու հաղորդման յուրաքանչյուր տեսակին ու թեկնածուին տրամադրված եթերի ժամանակն ու ծավալները: Մոնիթորինգի արդյունքների գրանցման համար, ըստ համապատասխան չափանիշների, մշակվել են հատուկ գրանցման թերթիկներ: Առանձին դիտարկվելու են այն հաղորդումները, որոնք ընդհանուր տեղեկատվություն են տրամադրում Նախագահական ընտրությունների վերաբերյալ՝ ընտրատեղամասեր, քվեարկության կարգ և այլն:
  «Նախագահական ընտրությունների նախընտրական քարոզչության մոնիթորինգ» սեմինարն իրականացվել է «Թրանսփարենսի Ինթերնեյշնլ» կազմակերպության ներկայացուցիչ Վախթանգ Սիրադեղյանի մասնակցությամբ: Նախընտրական քարոզչության մոնիթորինգը Վախթանգ Սիրադեղյանն առանձնացրեց 3 մասով.
 նախագահի թեկնածուների կողմից վարչական ռեսուրսների չարաշահում
 նախագահի թեկնածուների կողմից նախընտրական հիմնադրամներից իրականացվող ֆինանսական ծախսեր
 լրատվական ռեսուրսների օգտագործում
Վարչական ռեսուրսների չարաշահումը դիտարկվելու է հետևյալ չափանիշներով՝ պետական տեղական մարմինների աշխատակիցների մասնակցությամբ նախընտրական քարոզչություն, հանրային տարածքների օգտագործում, ուժային ռեսուրսների օգտագործում /քաղաքացիների ճնշումներ, ահաբեկումներ/:
Նախագահի յուրաքանչյուր թեկնածուի նախընտրական քարոզչության մոնիթորինգն իրականացնելու են 2 կամավորներ:
Կամավորների կողմից ուսումնասիրվելու են նաև թեկնածուների նախընտրական քարոզչանյութերի՝ պաստառները, գովազդային վահանակները:

Նախատեսվում է յուրաքանչյուր շաբաթվա վերջում ամփոփել և հրապարակել իրականացվող մոնիթորինգի արդյունքները:
  Նախագահական ընտրությունների մոնիթորինգն իրականացվում է «ՀՔԱ Վանաձորի գրասենյակի իրավապաշտպանական կարողությունների և գործունեության արդյունավետության բարձրացումը» ծրագի շրջանակներում: Ծրագրն իրականացվում է Բաց հասարակության ինստիտուտի աջակցության և Նիդերլանդների կառավարության համատեղ ֆինասավորմամբ: