Գյումրիում տեղի ունեցավ բազմամարդ հանրահավաք

Այսօր Գյումրիում տեղի ունեցավ բազմամարդ հանրահավաք` ի պաշտպանություն ԳԱԼԱ հեռուստաընկերության:

Հանրահավաքին մասնակցում էին մարզի մոտ 30 համայնքների ներկայացուցիչներ: Հանրահավաքի կազմակերպիչները` Խոսքի ազատության եւ ԳԱԼԱ հեռուստաընկերության պաշտպանության շտաբի անդամները նշեցին, որ Գյումրիում «մեկնարկել է նոր շարժում»:
«Սա նոր շարժում է լինելու` ընդդեմ բռնության, ընդդեմ անօրինականության եւ ընդդեմ ռեժիմի», - իր ելույթում ասաց Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը` պարզաբանելով. - «Որովհետեւ այն, ինչ կատարվում է ԳԱԼԱ հեռուստաընկերության նկատմամբ, դա... նախ եւ առաջ յուրաքանչյուրիս նկատմամբ է»:
«Մենք այստեղ հավաքվել ենք ցույց տալու համար մեր անկոտրում կամքը եւ մեր հետեւողականությունը, որ թույլ չենք տալու ռեժիմին եւ նրա լակեյներին փակելու մեր ազատ խոսքի իրավունքը», - հավելեց Սաքունցը:
Ելույթ ունեցավ նաեւ «Այլընտրանք» շարժման նախաձեռնողներից «Հայկական ժամանակ» օրաթերթի գլխավոր խմբագիր Նիկոլ Փաշինյանը` ասելով. - «Գյումրին ապացուցեց, որ ամենաազատասեր քաղաքն է Հայաստանի Հանրապետությունում»:
ԳԱԼԱ հեռուստաընկերության նկատմամբ հետապնդումները սկսվեցին այն բանից հետո, երբ հեռուստաընկերությունը անցած սեպտեմբերին ամբողջությամբ հեռարձակեց Հայաստանի առաջին նախագահ Լեւոն Տեր-Պետրոսյանի ելույթը:
  ԱՂԲՅՈՒՐԸ՝
http://www.azatutyun.am/armeniareport/report/ar/2007/12/4204F843-1E45-4DAC-941D-1BA46B8918B4.asp