ԵԱՀԿ երևանյան գրասենյակն աջակցում է խղճի և կրոնի ազատության շուրջ երկխոսությանը Հայաստանում

Այսօր Երևանում ԵԱՀԿ գրասենյակի աջակցությամբ կազմակերպվեց խղճի և կրոնի ազատության թեմայի շուրջ կլոր սեղան, որի շրջանակներում պետական մարմինների, հասարակական կազմակերպությունների և զանազան կրոնական կազմակերպությունների ներկայացուցիչները քննարկեցին խղճի և կրոնի ազատության կարգավիճակը Հայաստանում:

Հանդիպմանը մասնակցում էր նաև Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցը:
Քննարկման ընթացքում լուսաբանվեցին Հայաստանում կրոնական համայնքների խնդիրները, որը պետական մարմինների և կրոնական կազմակերպությունների միջև երկխոսության խթան հանդիսացավ: Մասնակիցները նաև քննարկեցին Հայաստանում կրոնական կազմակերպությունների գործունեությունը կարգավորող իրավական և քաղաքական դաշտը: Քննարկվեց նաև Հայաստանի Հանրապետության և Հայ Առաքելական եկեղեցու միջև հարաբերությունների կարգավորման մասին նոր ընդունված օրենքը, ինչպես նաև պետական քաղաքականությունը և գործունեությունը խղճի, կրոնի և հավատի ազատության դաշտում: «Այս քննարկումը կնպաստի իրավական և քաղաքական բարեփոխումների նախաձեռնությանը` տարբեր կրոնական կազմակերպություններին ընձեռելով իրենց հայացքներն արտահայտելու հնարավորություն», - ասաց ԵԱՀԿ երևանյան գրասենյակի մարդու իրավունքների հարցերով պատասխատու Սիլվիա Պոգոլշան: ՀՀ Ազգային փոքրամասնությունների և կրոնի հարցերի վարչության պետ Հրանուշ Խառատյանը նշեց, որ հանդիպման նպատակն էր իրազեկել կրոնական ազատությունների մասին և հավելեց, որ քննարկման ժամանակ ներկայացված խնդիրները կվերանայվեն քաղաքական որոշում կայացնող մարմինների կողմից: Հանդիպումը կազմակերպվել է ՀՀ Ազգային փոքրամասնությունների և կրոնի հարցերի վարչության նախաձեռնությամբ` ԵԱՀԿ աջակցությամբ: