ԹՌՈՒՑԻԿԸ ՎՏԱՆԳԱՎՈ՞Ր Է

Վանաձորի շենքերի պատերից ամեն գիշեր անհետանում են նոյեմբերի 16-ի հանրահավաքի մասին իրազեկող թռուցիկները:
Դրանք փակցնող «Այլընտրանք» նախաձեռնող խմբի անդամներն էլ ենթարկվում են ճնշումների:

«Այլընտրանք» հասարակական-քաղաքական նախաձեռնության Վանաձորի գրասենյակի ղեկավար Կարեն Սարգսյանի խոսքերով` իրենց նախաձեռնության անդամներին անընդհատ հետեւում են կամ թռուցիկներ փակցնելու ժամանակ ուղղակի մոտենում ու ասում, թե ո՞վ է նրանց նման բան թույլ տվել: «Երեկոյան էլ դանակով կտրել էին գրասենյակի վրա փակցրած Լեւոն Տեր-Պետրոսյանի նկարով հանրահավաքի մասին հայտարարությունը: Դրանով իբր ուզում են վախեցնել մեզ»,- պատմում է Սարգսյանը: Ճնշում գործադրողները, նրա ասելով, «ուժային կառույցներից էին եւ հանրապետական խմբերից»:
«Ամեն վայրկյան բախումներ լինելու զգացողություն կա այստեղ: Անգամ այս պահին մի ինչ-որ միջադեպի կանխազգացում ունեմ, քանի որ անցած օրը շատ լարված է եղել. ուղղակի մոտեցել էին մեր տղաներին ու բացահայտ սպառնացել: Ինձ էլ է զգուշացվել, որ մի քիչ հանգիստ լինեմ, բայց մենք նրանցից չենք վախենում, նրանք թող մտածեն»,- «Ա1+»-ին հայտնեց Կարեն Սարգսյանը:
Ոստիկանությանը դիմելն այս դեպքում Կարեն Սարգսյանն անօգուտ է համարում: «Այս անգամ ոստիկաններին հուշել եմ, որ եթե ուզում եք օրինախախտում չլինի ու ամեն ինչ տեսնեք ձեր աչքերով, ուրեմն մի անգամ մեր ետեւից եկեք ու պոկողին գոնե մի անգամ բռնեք: Իսկ նրանք պատասխանում են, որ դա անհնարին է»,- վստահեցնում է Կարեն Սարգսյանը:
Իսկ Վանաձորի ՀՀՇ խորհրդի նախագահ Աշոտ Մանուկյանն էլ «Ա1+»-ին փոխանցեց, որ իրենց նկատմամբ դեռ նման ճնշումներ չեն կիրառվել, քանի որ թռուցիկներն իրենք նախընտրել են փակցնել քաղաքի ծայրամասերում, դրա համար դրանք դեռ աչքի չեն ընկել ու չեն պոկվել: Սակայն նրանք հանրահավաքի օրը Վանաձորից Երեւան հասնելու խնդիր ունեն: «Վարորդներին անընդհատ զգուշացնում են, որ հանկարծ մեզ հետ համաձայնության չգան ու մարդ չտեղափոխեն հանրահավաքին մասնակցելու: Հիմա խորը վախի մթնոլորտ է քաղաքում: Նախորդ հանրահավաքին մեծ դժվարությամբ եկանք եւ հիմնականում սեփական միջոցներով»,- ասում է Աշոտ Մանուկյանը:
Բոլոր առկա եւ սպասվող ճնշումների դեպքում նա չի պատրաստվում դիմել ոստիկանությանը, քանի որ նրա ասելով՝ «այս իշխանություններին չի ընդունում եւ ըստ այդմ՝ այս իշխանությունների իրավապահ մարմիններին չի դիմի»:
  Աղբյուրը՝
http://www.a1plus.am/am/?page=issue&iid=54503