ՀՔԱ Հարավկովկասյան ցանցը հանդես է եկել համատեղ հայտարարությամբ

2007թ-ի նոյեմբերի 7-ին Թբիլիսիում կայացավ ՀՔԱ Հարավային Կովկասի ցանցի ղեկավարների արտակարգ հանդիպումը: Հանդիպման ժամանակ վերլուծվեց Վրաստանում վերջին օրերին ստեղծված իրավիճակը:

Հավաքվածները դատապարտեցին խաղաղ ցուցարարների նկատմամբ կիրառված բռնությունն ու հետևյալ տեքստով դիմեցին միջազգային հանրությանը.
«Մենք վկաներն ենք Վրաստանի իշխանությունների կողմից Վրաստանի Խորհրդարանի՝ ընդդիմադիր տրամադրված պատգամավորների և բողոքարկող ժողովրդի նկատմամբ կիրառված բռնության:
Էսկալացիան իրականացավ և ավելի է ուժգնանում Վրաստանի նախագահի ոչ կառուցողական քաղաքականության արդյունքում: Նա դեռևս դուրս չի եկել բողոքարկող ժողովրդի առջև և չի գնացել երկխոսության հրապարակում հավաքված ժողովրդի լայն մասսաների աջակցությունը վայելող ընդդիմության հետ:
Դրա արդյունքում ընդդիմության խաղաղ առաջակությունները փոխարինվեցին առավել արմատական պահանջներով՝ իշխանության փոփոխման և Մ. Սահակաշվիլու հրաժարականի վերաբերյալ:
Այսօր ողջ աշխարհն ականատես եղավ ժողովրդի դաժան ծեծի, որն առավոտյան հավաքվել էր խորհրդարանի մոտ այն բանից հետո, երբ բռնի կերպով դուրս էին բերվել անժամկետ հացադուլ հայտարարած քաղաքական կուսակցությունների լիդերները:
Մենք անհրաժեշտ ենք համարում միջազգային կազմակերպությունների հրատապ միջամտությունը՝ պահանջելով անհապաղ դադարեցնել քաղաքացիական բողոքի խաղաղ ակցիայի դեմ իշխանությունների կամայականությունն ու բռնությունը Թբիլիսիի փողոցներում՝ արցունքաբեր գազի, ռետինե փամփուշտների և այլ տեխնիկայի կիրառմամբ, և տալ համապատասխան գնահատական իշխանությունների հակաժողովրդական ու հակամարդասիրական վարքագծին:
Մենք մեր կոչն ենք ուղղում ՄԱԿ-ին, ԵԱՀԿ-ին, Եվրոպական Հանձնաժողովին, աշխարհի ժողովրդավարական երկրների կառավարություններին և այլ միջազգային կազմակերպություններին ու միջազգային հանրությանը՝ խնդրելով անհապաղ միջամտել, այլապես վտանգված է ժողովրդավարության կայունությունն ու ճակատագիրը ողջ Հարավային Կովկասի տարածաշրջանում:
  Ալեքսանդր Ռուսեցկի
Անահիտ Բայանդուր
Արզու Աբդուլաևա
Արթուր Սաքունց
Ակիֆա Ալիևա
Կարեն Օհանջանյան
Խամիս Մասիմով