Բռնություններ խաղաղ ցուցարարների նկատմամբ

Այսօր՝ 2007թ. նոյեմբերի 7-ին, մոտավորապես ժամը 12:30-ին Թբիլիսիում Ռուսթավելի պողոտայի պառլամենտին հարակից տարածքից ոստիկանության տարբեր ստորաբաժանումների աշխատակիցներ սկսեցին բռնի հեռացնել ցուցարարներին: Ցուցարարներին ցրեցին ջրի ուժեղ շիթով, արցունքաբեր գազի /որոշ տվյալներով նաև այլ տիպի/ օգնությամբ: Խաղաղ և անզեն ցուցարարների նկատմամբ կիրառվեց նաև ռետինե մահակներով ծեծ:
Միանշանակ է, որ Սահակաշվիլու իշխանությունը բռնի ուժով ցրեց խաղաղ ցույցը:
Բողոքի ցույցի եկած խաղաղ բնակչության նկատմամբ բռնությունների կիրառմամբ Սահակաշվիլու վարչախումբը ցույց տվեց, որ ոչ մի երկխոսություն ընդդիմության հետ չի պատրաստվում ունենալ: Իսկ ընդդիմության պահանջները նույնն են՝ ազատ արձակել քաղբանտարկյալներին, պառլամենտական ընտրություններն անց կացնել սահմանված ժամկետներում՝ 2008թ. ապրիլին: Սահակաշվիլու ցանկությամբ նույն պառլամենտը երկարացրել էր իր լիազորությունների ժամկետը մինչ 2008թ. նոյեմբեր: Այդ ժամանակ համատեղ պիտի իրականացվեին Վրաստանի պառլամենտական և նախագահական ընտրությունները:
  Մինչ նոյեմբերի 7-ի առավոտյան դեպքերը, նոյեմբերի 6-ի լույս 7-ի գիշերը Ռուսթավելի պողոտայի պառլամենտին հարակից տարածքից հեռացվել էին հացադուլավորներ և մի խումբ ցուցարարներ, նաև ձերբակալել էին նախկին նախարար եորգի Խաինդրավային: Այսօր առավոտյան ցուցարարներին միացավ նաև մինչ այդ չմասնակցող «Նոր այեր» կուսակցությունը:
  Ամբողջ իրադարձությունները ցուցադրվում էին «Իմեդնի» հեռուստաընկերության ուղիղ եթերով, նաև հանրային հեռուստաընկերությամբ: Հեռուստադիտողները ականատես են եղել ցուցարարների նկատմամբ կիրառվող բռնություններին, ծեծին և ուժի կիրառման ահավոր տեսարաններին:

Վրաստանից՝ Ա. Սաքունց
Տ°ես ՀՔԱ Հարավ - Կովկասյան ցանցի համատեղ հայտարարությունը (ռուսերեն)