«ԵՂԵԼ Է ՁԵՐԲԱԿԱԼՄԱՆ ՀՐԱՄԱՆ»

«Այլընտրանք» հասարակական-քաղաքական շարժման նախաձեռնող Նիկոլ Փաշինյանն այսօր «Ա1+»-ին հայտնեց, որ երեկ իրենց ձերբակալման վերաբերյալ միանշանակ եղել է հրաման:

Հիշեցնենք, որ Կորյուն-Աբովյան խաչմերուկներում երեկ ժամը 19:00-ի սահմաններում ոստիկանները շրջափակել են «Այլընտրանք» հասարակական նախաձեռնության երթի մասնակիցներին, խոչընդոտել նրանց` հոկտեմբերի 26-ի հանրահավաքի մասին իրազեկելու միջոցառումը, արցունքաբեր գազ փչել նրանց վրա եւ նախաձեռնության անդամներին քաշքելով մտցրել ոստիկանության ավտոմեքենաներ ու տարել Կենտրոնի ոստիկանություն:
  Բերման ենթարկվածների թվում են եղել Նիկոլ Փաշինյանը, «Ժողովրդավարական հայրենիք» կուսակցության նախագահ Պետրոս Մակեյանը, նրա որդին՝ Տիգրան Մակեյանը, «Չորրորդ իշխանություն» թերթի գլխավոր խմբագիր Շողեր Մաթեւոսյանը, Դավիթ Մաթեւոսյանը, Թեւոս Մաթեւոսյանը, Պահպանողական կուսակցության նախագահ Միքայել Հայրապետյանը, Տիգրան Տեր-Մարգարյանը եւ եւս երեք «Այլընտրանքի» համախոհներ:
  Ավելի քան 8 ժամ մնալով ոստիկանության բաժանմունքում՝ նրանք ուշ գիշերին՝ ժամը 3:20-ի սահմաններում ազատ են արձակվել:
  Նիկոլ Փաշինյանն իրենց ազատ արձակման հիմնական պատճառը համարում է Կենտրոնի ոստիկանության բակում հավաքված մի քանի տասնյակ մարդկանց ճնշումն ու ՀՀ առաջին նախագահ Լեւոն Տեր-Պետրոսյանի ժամանելը ոստիկանություն:
  «Իրենք հասկացան, որ եթե շարունակվի, առավոտյան այստեղ տասնյակ հազարավոր մարդիկ են հավաքվելու, ինչն արդեն իրադարձություններին շատ վատ ընթացք կտա: Դրա համար նրանք ուղղակի ստիպված էին մեզ ազատ արձակել»,- ընդգծեց նա:
  Փաշինյանը վստահեցնում է, որ երեկվա իրենց բոլոր գործողությունները «բացառապես եղել են օրենքի տառին համապատասխան»: «Անկախ նրանից, թե ինչ կասեն, մեր գործողությունները օրենքի տեսանկյունից անխոցելի են: Սա միանշանակ է»,- նշեց նա:
  Նշենք, որ այսօր ժամը 17:00-ին Նիկոլ Փաշինյանը եւ մյուս բերման ենթարկվածները երեկվա միջադեպերի մասին մամուլի ասուլիս են հրավիրել, որի հիմնական նպատակն է, ինչպես «Ա1+»-ին տեղեկացրեց Փաշինյանը՝ ցույց տալով օրենքի այն կետերը, որոնցով երեկ ուղղորրդվել են: