Մարդու իրավունքները ոտնահարվում են իրավապահ մարմինների կողմից

Հունիսի 4-ին Հելսինկյան Քաղաքացիական Ասամբլեայի Վանաձորի գրասենյակում հրավիրված էր մամլո ասուլիս: Ասուլիսը նվիրված էր Լոռու մարզում իրավապահ մարմինների գործունեության բնագավառում մարդու իրավունքների պաշտպանության խնդիրներին: ՀՔԱ Վանաձորի գրասենյակի ղեկավար Արթուր Սաքունցը անդրադարձավ Լոռու մարզի դատախազության գործունեությանը:
Լոռու մարզի դատախազությունը քրեական գործ է հարուցել 2007 թվականի հունվարի 26-ին Գուգարք գյուղում կատարված սպանության փաստի առիթով: Որպես մեղադրյալ գործում ներգրավվել է քաղաքացի Դավիթ Պապյանը: Լոռու մարզի դատախազության քննիչ Մարզպետ Խաչատրյանի միջնորդությամբ և Լոռու մարզի առաջին ատյանի դատարանի որոշմամբ որպես խափանման միջոց ընտրվել է կալանքը: Դատախազությունը ունեցել է ընդամենը մեկ ապացույց՝ մյուս մեղադրյալի ցուցմունքն այն մասին, որ Դավիթ Պապյանը մասնակցել է տվյալ սպանությանը:
Այն դեպքում, երբ բոլոր փորձագիտական եզրակացությունները հերքել են այն փաստը, թե Դավիթ Պապյանը մասնակցել է տվյալ սպանությանը: Որևէ ապացույց չկա այն մասին, որ Դավիթ Պապյանը գտնվել է բնակարանում, որտեղ կատարվել է սպանությունը:
Արթուր Սաքունցը հավաստում է, որ կազմակերպության ուսումնասիրությունները ևս հավաստում են, որ Դավիթ Պապյանը չի մասնակցել տվյալ սպանությանը և դատախազության գործողություններն ունեն դիտավորության միտում: Նրա գնահատմամբ նախաքննության ընթացքում դատախազության քննիչի կողմից իրականացված գործողությունները խախտում են մարդու իրավունքները: Ավելին, որպես խափանման միջոց կալանքն ընտրելու վերաբեյալ Լոռու մարզի առաջին ատյանի դատարանը նույնպես խախտել է Դավիթ Պապյանի արդար դատաքննության իրավունքը: Ըստ էության Լոռու մարզի առաջին ատյանի դատարանը հանդես է գալիս որպես դատախազության միջնորդությունը բավարարող մարմին:
Անթույլատրելի է այն փաստը, որ միայն մեկ ցուցմունքի հիման վրա Դավիթ Պապյանի նկատմամբ որպես խափանման միջոց կիրառվել է կալանքը: Հաշվի չի առնվել նաև այն փաստը, որ Դավիթ Պապյանը հիվանդ է շաքարախտով:
Արթուր Սաքունցը անդրադարձավ նաև ոստիկանության գործողություններին: ՀՔԱ Վանաձորի գրասենյակ դիմած քաղաքացու մայրը պատմել է, որ իր որդուն բերման են ենթարկել ոստիկանության Վանաձորի բաժանմունք հարցաքննության համար: Տվյալ քաղաքացուն պահել են 8 ժամ և նրա մոր հավաստմամբ ենթարկել են բռնութունների: Իմանալով, որ մայրը դիմել է ՀՔԱ Վանաձորի գրասենյակ և գրասենյակի կողմից բողոք է ներկայացվել Լոռու մարզի դատախազություն ոստիկանության աշխատակիցները փորձել են համոզել նրան ետ վերցնել բողոքը: Ներկայումս գործը գտնվում է ծառայողական քննության մեջ:
Վերջում Արթուր Սաքունցը կոչ արեց իրավապահ մարմիններին պրոֆեսիոնալ մոտենան իրենց աշխատանքին՝ օրենքի և մարդու իրավունքների պահպանման համար: