Մամլո հաղորդագրություն

Ապրիլի 13-ին Հելսինկյան Քաղաքացիական Ասամբլեայի Վանաձորի գրասենյակում հրավիրված էր մամուլի ասուլիս: Ասուլիսի նպատակն էր հանրությանը ներկայացնել ՀՔԱ Վանաձորի գրասենյակի կողմից առաջիկա Ազգային ժողովի ընտրությունների ընթացքում իրականացվող գործողությունները:
ՀՔԱ Վանաձորի գրասենյակի ղեկավար Արթուր Սաքունցը տեղեկացրեց, որ առաջիկա ընտրություններին կազմակերպությունն իրականացնելու է
* նախընտրական քարոզչության և քվեարկության դիտորդություն
* հեռուստատեսության և տպագիր մամուլի ուսումնասիրություն
* ընտրական իրավունքի խախտման կանխարգելման և վերականգնման իրավական աջակցություն
Ապրիլի 3-ին Կենտրոնական ընտրական հանձնաժողովը գրանցել է կազմակերպությանը՝ դիտորդական առաքելություն իրականացնելու նպատակով: Լոռու, Տավուշի և Շիրակի մարզերում դիտորդական առաքելություն կիրականացնեն 51 դիտորդներ: Դիտորդների խնդիրն է ոչ միայն գրանցել ընտրական խախտումները, այլ նաև կանխարգելել դրանք:

Լոռու մարզում են գտնվում ԵԱՀԿ 3 դիտորդներ, որոնց հետ կազմակերպությունը ակտիվորեն համագործակցում է:
  Նախընտրական քարոզչության ընթացքում Լոռու մարզի Վանաձոր, Սպիտակ, Ալավերդի, Տաշիր, Ստեփանավան քաղաքներում իրակացվում է տեղական հեռուստաալիքների և տպագիր մամուլի մոնիտորինգ: Արթուր Սաքունցը նշեց, որ լրատվամիջոցները պետք է լինեն ազատ, ոչ մի ճնշման չենթարկվեն:

ՀՔԱ Վանաձորի գրասենյակի աշխատակից Հայկուհի Հարությունյանը ներկայացրեց «Իրավական նախաձեռնություն, ընտրություններ 2007» ծրագրի շրջանակներում նախատեսված գործողությունները:
Առաջիկա ընտրությունների կապակցությամբ հանրապետության ողջ տարածքը բաժանվել է 3 մեծ տարածքների: Հյուսիսի՝ Շիրակի, Լոռու, Տավուշի և Գեղարքունիքի մարզերի աշխատանքները համակարգում է ՀՔԱ Վանաձորի գրասենյակը:
«Իրավական նախաձեռնության» շրջանակներում իրականացվելու են հեևյալ գործողությունները.
* իրավական նախաձեռնության և հնարավոր խախտումների վերաբերյալ տեղեկատվության տարածում
* ընտրական իրավունքի հնարավոր խախտումների դեպքում տեղում տեղեկատվության պարզաբանում
* կոնկրետ դեպքի առնչությամբ իրավական աջակցություն

Նախընտրական քարոզչության ողջ ընթացքում, քվեարկության օրը, և արդյունքների ամփոփման ժամանակ գործելու է իրավաբանական խորհրդատվության անվճար «թեժ գիծը»՝ 0808804:
ՀՔԱ Վանաձորի գրասենյակը շաբաթը մեկ անգամ կներկայացնի խախտումների հետ կապված իր դիտարկումները, նաև դրանց կանխման համար կազմակերպության կողմից ձեռնարկված քայլերը: