Պահանջում են Վանաձորի քաղաքապետի հեռացումը

Վեց վանաձորցի Վանաձորի քաղաքապետին անվստահություն հայտնելու ցանկություն է հայտնել: Այդ նպատակով դեռևս փետրվարին Սամվել Դարբինյանի գործունեությունից դժգոհ քաղաքացիները կազմել են նախաձեռնող խումբ ու տեղական հանրաքվե նախաձեռնելու մասին որոշում կայացրել:

Նախքան իր մտադրությունն իրականացնելը, ըստ գործող կարգի, նախաձեռնող խումբը մարտին 14-ին դիմում է ներկայացրել թիվ 30 ընտրատարածքային հանձնաժողով՝ իրեն գրանցելու մասին: 15-օրյա ժամկետում հանձնաժողովը կորոշի, խմբին գրանցել, թե ոչ: Չգրանցելու դեպքում նախաձեռնող խումբը կարող է այն բողոքարկել դատական կարգով, իսկ գրանցվելուց հետո ընտրատարածքային հանձնաժողովը խմբին կհանձնի տեղական հանրաքվե անցկացնելու մասին որոշման նախագծի վկայականը: Սրանից բացի, նախաձեռնող խմբին կտրվի հանրաքվեի անցկացման նախաձեռնությունը պաշտպանելու համար պահանջվող ստորագրահավաքի պաշտոնաթերթիկները՝ ընտրելու իրավունք ունեցող վանաձորցիների 5 տոկոսի չափով:
  Ստորագրահավաքն ըստ կարգի անցկացնելուց հետո վանաձորի ավագանին կորոշի հարաքվեի օրը: հանրաքվեի օրը վանաձորցիները «այո» կամ «ոչ» կասեն հետևյալ հարցին. «Կողմ եք, որ Վանաձորի քաղաքապետ Սամվել Դարբինյանին պաշտոնանկ անելու վերաբերյալ Վանաձորի համայնքի ավագանին Լոռու մարզպետին առաջարկություն ներկայացնի»: Այնուհետև կանցկացվի տեղական հանրաքվե, որի արդյունքների վավերականությունը կորոշի ընտրատարածքային հանձնաժողովը: Եթե հարցին «այո» պատասխանի քվեարկության մասնակիցների կեսի ավելին և որևէ անճշտություն չարձանագրվի, ընտրատարածքային հանձնաժողովը արդյուքնների մասին կտեղեկացնի Վանաձորի ավագանուն, իսկ Լոռու մարզպետին կծանուցի դիմել ՀՀ վարչապետին՝ քաղաքապետին պաշտոնանկ անելու վերաբերյալ որոշում կայացնելու մասին:
  Մինչ թիվ 30 ընտրատարածքային հանձնաժողովը կորոշի գրանցել նախաձեռնող խմբին, թե ոչ, նախաձեռնող խմբի կողմից լիազորված ներկայացուցիչ Արթուր Սաքունցի ու մի քանի անդամների հրավիրված այսօրվա ասուլիսը այդպես էլ տեղի չունեցավ: Որևէ լրագրող չէր եկել ասուլիսի այն դեպքում, երբ տեղյակ էին պահվել Վանաձրում գործող ու հանրապետական լրատվամիջոցների գրեթե բոլոր ներկայացուցիչները: «Լոռու մարզ» թերթի խմբագիր Մանվել Միկոյանն իրենց բացակայությունը բացատրեց լրագրողների պակասով ու այսօրվա իրադարձությունների մեծ հոսքով: