Տեղական հանրաքվեի նախաձեռնություն Վանաձորում

2007թ-ի մարտի 14-ին Վանաձորի թիվ 30 Ընտրատարածքային հանձնաժողովին հանձնվեց դիմում՝ տեղական հանրաքվե անցկացնելու նպատակով նախաձեռնող խումբը գրանցելու խնդրանքի մասին:
2007թ-ի փետրվարին Վանաձոր համայնքի ղեկավարին անվստահություն հայտնելու նպատակով Վանաձորի քաղաքացիներից ձևավորվել է նախաձեռնող խումբ:
2007թ-ի փետրվարի 10-ին նախաձեռնող խումբն իր անդրանիկ ժողովում ընդունեց «Վանաձոր համայնքի ղեկավար՝ Սամվել Դարբինյանին պաշտոնանկ անելու վերաբերյալ Լոռու մարզպետին առաջարկություն ներկայացնելու մասին» տեղական հանրաքվե նախաձեռնելու որոշում:
Նախաձեռնող խմբի դիմումն ստանալու օրվանից 15-օրյա ժամկետում հանրաքվեի ընտրատարածքային հանձնաժողովը պետք է ստուգի դիմումի և դրան կից ներկայացված փաստաթղթերի օրինականությունը և ընդունի որոշում նախաձեռնող խումբը գրանցելու կամ գրանցումը մերժելու մասին:
Նախաձեռնող խմբին գրանցելու մասին որոշում ընդունելուց հետո ընտրատարածքային հանձնաժողովը պետք է խմբի լիազոր ներկայացուցչին հանձնի տեղական հանրաքվեի դնելու համար առաջարկվող որոշման նախագծի գրանցման վկայականը և հանրաքվեի անցկացման նախաձեռնությունը պաշտպանելու համար ստորագրահավաքի պաշտոնաթերթիկները:
Պաշտոնաթերթիկն ստանալուց 30 օրվա ընթացքում նախաձեռնող խումբը պետք է հավաքի հանրաքվեին մասնակցելու իրավունք ունեցող անձանց ընդհանուր թվի 5 տոկոսի չափով ստորագրություններ:
Ստորագրությունների հավաքագրումից հետո՝ 7 օրվա ընթացքում ընտրատարածքային հանձնաժողովը պետք է ստուգի դրանց հավաստիությունը, այնուհետև համայնքի ավագանին պետք է նշանակի տեղական հանրաքվեի օրը:

Նախաձեռնող խմբի գրանցումը մերժելու դեպքում այն կարող է բողոքարկվել դատական կարգով:
Տեղական հանրաքվեի մասին ավելի մանրամասն տեղեկությունների համար կարող եք դիմել ՀՔԱ Վանաձորի գրասենյակ՝ Արթուր Սաքունցին:
էլ փոստ: asakunts@hcav.am
հեռ: 0322 42268